१.
प्रकृतिको पाएर शृङ्गार नन्दन वाग झैं
आह्लादको मधुर गीतको सुन्दर राग झैं
स्मृतिको कन्दरामा बस्यो पाल्पा
मस्तिष्कमा लेखियो नमेटिने याद भै
२.
दक्षिणमा चुरे, महाभारत उत्तर
हवामा छ उडेको गुलाबी अत्तर
मन हर्ने चन्चलता खोलाहरूमा
सिन्दुरे लाली हर प्रहर
३.
तानसेन हाम्रो अहा ! राम्रो दख्खिन मुखमा
घामले सधैं उज्यालो पारी बसेको सुखमा
पहाडी रानी झलल्ल बनी बिहान साँझमा
बसेका छन् अमिट छाप मुटुकाे माझमा
४.
लेक र बेँसी, गोरेटा-बाटाहरूमा
जिन्दगीका हरेक पाटाहरूमा
जीजीबीसा राख्दछन् नरनारी
मुहारमा हरपल गुलाबी रङ्ग छरी
५. (हाइकु)
मस्याम, डुम्रे घर
महिना दिनलाई
यादका अत्तर
६. (मित्रताका ती पल)
राईझुमाको लय, रोदीघरका गीत
मित्रताको स्वर हासोको सङ्गीत
कम्मर मर्काई, ताली पड्काई
साथ पाई मित्रजनको, साह्रै रमाई
बित्यो समय कति छिटो पीर सबै भुलाई
